ჩასვლისას მომიწია საგნების და ჯგუფების დამოუკიდებლად არჩევა. ვილნიუსში ყოფნის დროს გავიარე შვიდი საგანი: კრიტიკული მედიცინა, სასამართლო მედიცინა, პედიატრია და ნეონატოლოგია, ინფექციური დაავადებები და დერმატოვენეროლოგია, ნეფროლოგია და უროლოგია, ოფთალმოლოგია, რევმატოლოგია და გერონტოლოგია. სწავლის პერიოდში მქონდა მუდმივი კომუნიკაცია ვილნიუსის უნივერსიტეტის კოორდინატორთან.

ჩემთვის ახალი გამოცდილება იყო ჩაწერილი ლექციების ონლაინ ფორმატში მოსმენა. სემინარების უმეტესი ნაწილი პრაქტიკულ სამუშაოებს მოიცავდა. ყოველ სემინარზე ახალ მასალასთან ერთად შესაბამის პაციენტებსაც ვხვდებოდით, რაც მიღებული თეორიული ცოდნის დამახსოვრებას მიადვილებდა.

ფინალური გამოცდები ყოველთვის ტესტური ფორმით ტარდებოდა საგამოცდო ცენტრში,. მასალას და სილაბუსს კი სემინარის დასაწყისში გვაცნობდნენ.  გამოცდამდე ლექტორები ცდილობდნენ მხოლოდ იმ საკითხებზე გაემახვილებინათ ყურადღება რაც ტესტებში იქნებოდა მოცემული.

გავლილი საგნებიდან ჩემთვის ყველაზე საინტერესო ოფთალმოლოგია იყო. სემინარებზე გავეცანით თვალის ანატომიას და დაავადებებს. ასევე, ვესწრებოდით ქირურგიულ ოპერაციებს და პაციენტებს ვუტარებდით თვალის გამოკვლევებს სპეციალური ხელსაწყოებით.

ჩემმა უნივერსიტეტმა მომცა შანსი რომ მიმეღო ევროპული განათლება. გაცვლითმა პროგრამამ გააუმჯობესა ჩემი ინგლისური ენის ცოდნა,  ვიმოგზაურე სხვადასხვა ქვეყანაში და გავეცანი მათ კულტურას. შევიძინე უამრავი საერთაშორისო მეგობარი. ყოველი ახალი გაცნობილი მეგობარი  ჩემს ცნობიერებაში წარუშლელ შთაბეჭდილებას ტოვებდა. შემიძლია თამამად განვაცხადო, ჩემი თავგადასავალი სწორედაც რომ ფერადოვან კულტურათა ჰარმონიული თანაარსებობა აღმოჩნდა.