თსა-მ ნეირომეცნიერების კონფერენციას უმასპინძლა. ღონისძიება დენდი თსა-ს ნეიროქირურგიული კლუბის ორგანიზებით გაიმართა. კონფერენციის მიზანი იყო ამ სფეროს მრავალფეროვნების ხაზგასმა და აუდიტორიისთვის ისეთი საინტერესო თემების შესახებ ინფორმაციის მიწოდება როგორიცაა ნევროლოგია, ფსიქიატრია, ქცევის მეცნიერება, ფსიქოლოგია და ნეიროქირურგია.

კონფერენციაზე მოხსენებები წარადგინეს: კლინიკურმა ფსიქოლოგმა, ფსიქოთერაპევტმა, ასოცირებულმა პროფესორმა სოსო დოლიძემ, ნევროლოგმა ნინო გზირიშვილმა, თსა-ს ასოცირებულმა პროფესორმა გელა ბესელიამ, ივ. ბერიტაშვილის სახელობის ექსპერიმენტული ბიომედიცინის ცენტრის ქცევისა და კოგნიტიურ ფუნქციათა ლაბორატორიის მეცნიერ- თანამშრომელმა ბარბარე ნოზაძემ, ნეიროქირურგმა ლიკა ხორბალაძემ და ნეიროქირურგიის რეზიდენტმა ალექსანდრე ნაჯაროვმა.

ღონისძიების ბოლო ნაწილი პანელურ დისკუსიას დაეთმო თემაზე: ,,ფსიქიატრიული პაციენტის მენეჯმენტი სხვადასხვა თემაზე", რომელშიც მონაწილეობა მიიღეს ფსიქიატრმა დიანა ვერძაძემ, ნევროლოგმა გუჩი კობაიძემ და ფსიქოლოგმა ანი რაინაულმა.

Walter E. Dandy Neurosurgical Society აშშ-ში 2011 წელს დაარსდა და მისი მიზანია შექმნას საერთო ფორუმი ნეიროქირურგიისა და ნეირომეცნიერების მიმართულებით დაინტერესებული ექიმებისა და სტუდენტებისთვის. დენდის საზოგადოების მნიშვნელოვან რგოლს წარმოადგენს სტუდენტური კლუბები, რომელიც უკვე 60-მდე ქვეყანაშია ჩამოყალიბებული და საქართველოც ორი წლის წინ შეუერთდა ამ ქვეყნების რიცხვს.