3-5 მაისს, საქართველოს ალერგოლოგიისა და კლინიკური იმუნოლოგიის ასოციაციის (საკია/GAACI) ორგანიზებით და პეტრე შოთაძის სახელობის თბილისის სამედიცინო აკადემიის მხარდაჭერით ჩატარდა ალერგიის მსოფლიო ორგანიზაციის (WAO) 75 წლისთავისადმი მიძღვნილი საიუბილეო საერთაშორისო კონგრესი - „GAACI meets WAO“. მასში მონაწილეობა მიიღეს დარგის წამყვანმა საერთაშორისო ექსპერტებმა, მათ შორის: ნობელის პრემიის ლაურეატმა აარონ ჩეხანოვერმა, WAO-ს მოქმედმა პრეზიდენტმა მარიო მორაის ალმეიდამ და ორგანიზაციის ყოფილმა პრეზიდენტებმა, ასევე ამერიკისა და ევროპის აკადემიების მმართველი საბჭოს წარმომადგენლებმა. 

სამეცნიერო სესიების პარალელურად, სტუდენტებს, რეზიდენტებსა და ახალგაზრდა მკვლევრებს შესაძლებლობა ჰქონდათ მონაწილეობა მიეღოთ „საერთაშორისო სკოლა ალერგოლოგიასა და იმუნოლოგიაში“ აქტივობებში. საერთაშორისო კონგრესის სწორედ ამ მოდულის ფარგლებში 5 მაისს თსა-მ დაინტერესებულ სტუდენტებს უმასპინძლა ენზიმ-შეკავშირებული იმუნოსორბენტული ანალიზისა (ELISA) და პოლიმერაზული ჯაჭვური რეაქციის (PCR) პრაქტიკულ ვორკშოპებზე.