პროფესორი მლადენ კრაჯაჩიჩი, ზაგრების უნივერსიტეტის საბუნებისმეტყველო-მათემატიკური ფაკულტეტის ემერიტუსი და თსა-ს პროფესორი, ბიოლოგიის მიმართულების სტუდენტთა მე-11 სიმპოზიუმზე (SiSB) პლენარული მომხსენებლის სტატუსით იყო მიწვეული. ამ ღონისძიების ფარგლებში ჩაიწერა მასთან ინტერვიუ, რომელიც ხორვატულმა მედიაპორტალმა tportal.hr-მა გამოაქვეყნა.

ინტერვიუში განხილულია თანამედროვე მედიცინის ერთ-ერთი მთავარი გამოწვევა, ანტიბიოტიკებისადმი რეზისტენტობა, და ბაქტერიული ინფექციების მკურნალობაში ბაქტერიოფაგების პოტენციური როლი.

პროფესორი კრაჯაჩიჩი ინტერვიუში აღნიშნავს ბაქტერიოფაგების მთავარ უპირატესობებს:

• მაღალი სპეციფიკურობა: ფართო სპექტრის ანტიბიოტიკებისგან განსხვავებით, ფაგები კონკრეტული ბაქტერიების ან მათი შტამების წინააღმდეგ არის მიმართული.

• მიკროფლორის დაცვა: სპეციფიკურობიდან გამომდინარე, ფაგები არ აზიანებენ ადამიანის ნორმალურ მიკროფლორას.

• ეფექტურობა რეზისტენტობის პირობებში: ფაგების გამოყენება განსაკუთრებით მნიშვნელოვანია იმ შემთხვევებში, როდესაც სამიზნე პათოგენური ბაქტერიები ხელმისაწვდომი ანტიბიოტიკების მიმართ მდგრადია.

ამ უპირატესობების მიუხედავად, ფაგოთერაპიის პრაქტიკული გამოყენება რამდენიმე გამოწვევას უკავშირდება, მათ შორის კვლევითი და კლინიკური ინფრასტრუქტურის ხელმისაწვდომობას, ასევე კვალიფიციური და ინტერდისციპლინური გუნდის საჭიროებას.

საუბრისას პროფესორმა კრაჯაჩიჩმა ასევე ისაუბრა მოდიფიცირებული ვირუსების გამოყენებაზე გენურ თერაპიაში, წამლების მიზნობრივი მიწოდების მიდგომებში, ვაქცინების შემუშავებასა და ონკოლიზურ თერაპიაში (სიმსივნური უჯრედების შერჩევითი განადგურება).

ინტერვიუს სრული ვერსიის სანახავად, გთხოვთ, მიჰყვეთ ბმულს: