საზოგადოებასთან და სოციალურ პარტნიორებთან ურთიერთობის სტრატეგიის ფარგლებში თბილისის სამედიცინო აკადემიამ ივნისის პირველ კვირაში ორი სოციალური ინიციატივა განახორციელა.

2026 წლის 4-5 ივნისს, ინსტიტუციური კულტურის განვითარების დეპარტამენტის თანახელმძღვანელი მაკა მაღლაკელიძე და თსა-ს სტუდენტები ეწვივნენ Europa Donna Georgia-ს „ვარდისფერ სივრცეს“, სადაც მონაწილეობა მიიღეს არტთერაპიის სესიებში და შეხვდნენ ძუძუს კიბოს დიაგნოზის მქონე ქალებს. პაციენტების ისტორიებისა და ერთობლივი დისკუსიების მეშვეობით სტუდენტებმა უკეთ გაიაზრეს პაციენტის პერსპექტივით დანახული ბრძოლა კიბოსთან, რაც ეხმარება სტუდენტებს ემპათიისა და კომუნიკაციის უნარების გაძლიერებაში.

მეორე ინიციატივა 7 ივნისს, ბავშვთა დაცვის საერთაშორისო დღის აღსანიშნავად, დაუნის სინდრომის ფონდთან თანამშრომლობით გაიმართა. თსა-ს ექიმებმა და აკადემიურმა პერსონალმა, მათ შორის პროფესორებმა: კახა ბრეგვაძემ, ია ხურცილავამ, ეკა გოზალიშვილმა და ირაკლი ხუნდაძემ, დაუნის სინდრომის მქონე ბავშვებსა და მოზარდებს უფასო სამედიცინო კონსულტაციები გაუწიეს. საჭიროების შემთხვევაში, მონაწილეებმა მიიღეს სამედიცინო რეკომენდაციები და გადამისამართდნენ შესაბამის სპეციალისტებთან დამატებითი დიაგნოსტიკური კვლევებისა და მკურნალობისთვის.

კონსულტაციების პროცესში აქტიურად მონაწილეობდნენ თსა-ს სტუდენტები, რომლებმაც მიიღეს პრაქტიკული გამოცდილება პაციენტზე ორიენტირებულ ზრუნვაში და უკეთ გაეცნენ იმ გამოწვევებს, რომელთა წინაშეც დგანან დაუნის სინდრომის მქონე პირები და მათი ოჯახის წევრები.

ინიციატივა განხორციელდა თსა-ს ინსტიტუციური კულტურის განვითარების დეპარტამენტის, დაუნის სინდრომის ფონდისა და სოციალური ორგანიზაციის „ბაბალეს“ თანამშრომლობით. მისი მიზანი იყო დაუნის სინდრომის მქონე პირებისთვის სამედიცინო სერვისებსა და პროფესიულ მხარდაჭერაზე ხელმისაწვდომობის გაუმჯობესება.