ფაკულტეტის განვითარების დეპარტამენტის ორგანიზებით აკადემიურ და მოწვეულ პერსონალთან სამუშაო შეხვედრა გაიმართა.
შეხვედრის მიზანი იყო ლექციებისგან თავისუფალი სასწავლო პროგრამის განხორციელების პირველი წლის გამოცდილების გაზიარება, რეფლექსია, მიღწევების, გამოწვევებისა და სამომავლო შესაძლებლობების განხილვა.
ღონისძიების ფარგლებში პედაგოგებს შესაძლებლობა ჰქონდათ, ღიად ესაუბრათ საკუთარი გამოცდილების შესახებ, გაეზიარებინათ წარმატებული პრაქტიკები, განეხილათ არსებული სირთულეები და ერთობლივად ემსჯელათ მათი გაუმჯობესების გზებზე. კოლეგებს შორის გამოცდილების გაცვლამ ხელი შეუწყო ახალი იდეების, სწავლების ეფექტური სტრატეგიებისა და პრაქტიკული გადაწყვეტილებების გაზიარებას.
ხარისხის უზრუნველყოფის სამსახურმა წარმოადგინა ლექციებისგან თავისუფალი პროგრამის ანალიზი, რომელიც ეფუძნებოდა სტუდენტებისგან მიღებულ უკუკავშირსა და მიმართულებების ხელმძღვანელებთან ჩატარებული ფოკუსჯგუფების შედეგებს. რეფლექსიურ შეხვედრას ესწრებოდნენ პროგრამების ხელმძღვანელები და დეკანი, რომლებიც აქტიურად ჩაერთნენ დისკუსიებში, მოისმინეს აკადემიური პერსონალის მოსაზრებები და გამოცდილება, ასევე წარმოადგინეს მნიშვნელოვანი უკუკავშირი.
პროგრამების ხელმძღვანელებმა აღნიშნეს, რომ მსგავსი შეხვედრები და რეფლექსიური პრაქტიკა უმნიშვნელოვანესია ლექტორებს შორის თანამშრომლობის გაძლიერებისთვის, ინოვაციების წარმატებით განხორციელებისა და სწავლების ხარისხის უწყვეტი გაუმჯობესებისთვის.