ჩვენი გუნდისა და ფაკულტეტის წევრების , 22–26 აგვისტოს, ვენაში, ავსტრიაში, AMEE 2026 წლის კონფერენციაში მონაწილეობამ შესაძლებლობა მოგვცა, ჯანდაცვის სფეროში მიმდინარე გლობალური მოვლენები კიდევ ერთხელ დაგვეკავშირებინა იმ საგანმანათლებლო ეკოსისტემასთან, რომელსაც პეტრე შოთაძის სახელობის თბილისის სამედიცინო აკადემიაში ვავითარებთ.
AMEE 2026-ზე თსა-ს გუნდს წარმოადგენდნენ: ირინე შოთაძე, რექტორი; ანა მამისეიშვილი, რექტორის მიმდინარე საქმეების კოორდინატორი; კახა ბრეგვაძე, ერთსაფეხურიანი საგანმანათლებლო პროგრამების თანახელმძღვანელი; მაკა მაღლაკელიძე, ინსტიტუციური კულტურის განვითარების დეპარტამენტის თანახელმძღვანელი; თინათინ ახვლედიანი, მედიცინის სკოლის დეკანის მოადგილე სტუდენტებთან ურთიერთობის მიმართულებით.
კონფერენციის მთავარი თემა წელს იყო - „განმანათლებლები, როგორც კატალიზატორები: ჯანდაცვის მომავლის შექმნა“. მასში მონაწილეობდნენ განათლებისა და ჯანდაცვის სფეროს პროფესიონალები, რომლებიც მსჯელობდნენ, თუ როგორ შეუძლია განათლებას გავლენა მოახდინოს არა მხოლოდ მომავალი კლინიცისტების, არამედ იმ ჯანდაცვის სისტემებისა და საზოგადოებების ჩამოყალიბებაზე, რომლებსაც ისინი მომავალში მოემსახურებიან. ისეთი თემები, როგორიცაა ფაკულტეტის განვითარება, ავთენტური შეფასება, ჰუმანიტარული მეცნიერებები, თანასწორობა, პაციენტის უსაფრთხოება, ტექნოლოგიებით გაძლიერებული სწავლება, მდგრადობა და გლობალური ჯანმრთელობა, პირდაპირ უკავშირდება განათლების ხარისხის გაუმჯობესებისა და ინსტიტუციური განვითარების მიმართულებით ჩვენს პრიორიტეტებს.
ჩვენი საქმიანობისთვის ერთ-ერთი მნიშვნელოვანი მიმართულება იყო - „გლობალური სწავლების კატალიზატორები: კულტურათაშორისი საგანმანათლებლო კვლევითი ჩარჩოს შექმნა ხელოვნებაზე დაფუძნებული ჯანდაცვის პროფესიებისათვის“. ეს ასახავს მიდგომას, რომელსაც ჩვენს საგანმანათლებლო ეკოსისტემაში სულ უფრო მეტად ვნერგავთ: მედიცინის სწავლება არ უნდა შემოიფარგლებოდეს მხოლოდ ბიოსამედიცინო ცოდნით ან კლინიკური გარემოთი.
თსა-ს ისეთი ინიციატივები, როგორიცაა „სოფლის ექიმის ექვსი დღე“ და „მედიცინისა და ემპათიის სწავლება ხელოვნების მეშვეობით“, სამედიცინო განათლებას აკავშირებს საზოგადოების გამოცდილებასთან, ჰუმანიტარულ მეცნიერებებთან, ემპათიასთან და პაციენტების ცხოვრებისეულ რეალობასთან. ამგვარი გამოცდილების მეშვეობით სტუდენტებს შესაძლებლობა ეძლევათ, ჯანდაცვა აღიქვან არა მხოლოდ როგორც კლინიკური საქმიანობა, არამედ როგორც სოციალური პასუხისმგებლობა.
ეს ქმნის ინტერდისციპლინური და ტრანსდისციპლინური სწავლისა და სწავლების შესაძლებლობებს, სადაც მედიცინა იკვეთება ჰუმანიტარულ და სოციალურ მეცნიერებებთან, საზოგადოებრივ ჩართულობასთან, ეთიკასა და ხელოვნებასთან. შედეგად, უმჯობესდება წარმოდგენა იმაზე, თუ რას ნიშნავს ექიმად ჩამოყალიბება, და ძლიერდება კავშირი აკადემიურ სწავლებასა და საზოგადოების საჭიროებებს შორის.
AMEE-ს კონფერენციაზე გამახვილებული აქცენტები ავთენტურ შეფასებაზე, ფაკულტეტის განვითარებაზე, სწავლის დიზაინსა და პაციენტის უსაფრთხოებაზე ჩვენი საგანმანათლებლო პრაქტიკის უწყვეტი გაუმჯობესებისთვის მნიშვნელოვან პერსპექტივას გვთავაზობს.
საერთაშორისო კონფერენციაში მონაწილეობის მნიშვნელობა, მთლიანობაში განისაზღვრება იმით, თუ რა ცოდნასა და მიდგომებს მოვიტანთ ჩვენს აკადემიურ გარემოში: როგორ შეიძლება მათ ხელი შეუწყონ სასწავლო პროგრამების განვითარებას, გააძლიერონ კლინიკური კომპეტენციების შეფასება, მხარი დაუჭირონ ფაკულტეტის პროფესიულ განვითარებას და გაამდიდრონ სწავლებისა და სწავლის პროცესი.
ჩვენი მიზანია, თსა განვავითაროთ როგორც საგანმანათლებლო მიზიდულობის ცენტრი, სადაც სამედიცინო განათლება, კლინიკური პრაქტიკა, კვლევა, ინოვაცია და საზოგადოებრივი ჩართულობა ერთმანეთისგან განცალკევებული საქმიანობების ნაცვლად, ურთიერთგამაძლიერებელ მიმართულებებს წარმოადგენს.
სტრატეგიული პარტნიორობა
ჩვენთვის ინტერნაციონალიზაცია მხოლოდ პარტნიორობების რაოდენობის ზრდას არ გულისხმობს. ჩვენ ვისწრაფვით საერთო ღირებულებაზე დაფუძნებული ისეთი პარტნიორობების ჩამოყალიბებისკენ, რომლებიც ქმნის ხელშესახებ შედეგებს: ფაკულტეტის განვითარებას, სტუდენტებისთვის ახალ შესაძლებლობებს, ერთობლივ საგანმანათლებლო ინიციატივებს, კვლევით თანამშრომლობას, ცოდნის გაცვლასა და სწავლებისა და სწავლის პროცესის გაზომვად გაუმჯობესებას.
ამ თვალსაზრისით, საერთაშორისო პარტნიორობები ჩვენი ხარისხის გაუმჯობესების სტრატეგიის განუყოფელი ნაწილს შეადგენს და პირდაპირ უწყობს ხელს ჩვენი საგანმანათლებლო ეკოსისტემის განვითარებას.
კონფერენცია და ჩვენი მესამე მისია
ვენაში განხილული იდეები ასევე აძლიერებს ჩვენს ერთგულებას მესამე მისიის მიმართ - განათლებისა და კვლევის საზოგადოების საჭიროებებთან დაკავშირებას და ცოდნის საზოგადოებისთვის მნიშვნელოვან ღირებულებად გარდაქმნას.
ჩვენი სოციალური პასუხისმგებლობის პროექტები მესამე მისიის პრაქტიკულ საფუძველია, რომლებიც სტუდენტებს შესაძლებლობას აძლევს, ჩაერთონ საზოგადოებრივ ცხოვრებაში, განივითარონ ემპათია და გაიაზრონ ჯანდაცვის მნიშვნელობა აუდიტორიის და კლინიკის მიღმა.