პეტრე შოთაძის სახელობის თბილისის სამედიცინო აკადემიის ვიცე-რექტორმა კვლევის მიმართულებით, პროფესორმა ეკატერინე კლდიაშვილმა, მონაწილეობა მიიღო ORPHEUS-ის აღმასრულებელი კომიტეტის შეხვედრაში, რომელიც 7 სექტემბერს, ზაგრებში (ხორვატია) გაიმართა.
ORPHEUS არის ევროპული ორგანიზაცია, რომელიც აერთიანებს უნივერსიტეტებსა და სამედიცინო და ბიომედიცინის მიმართულების უმაღლეს საგანმანათლებლო დაწესებულებებს, რომლებიც მუშაობენ სადოქტორო განათლებისა და კვლევის ხარისხის განვითარების მიმართულებით. ორგანიზაცია განსაზღვრავს საერთაშორისო სტანდარტებს, ხელს უწყობს საუკეთესო პრაქტიკის გაზიარებას და აძლიერებს საერთაშორისო თანამშრომლობას სადოქტორო განათლების სფეროში.
პროფესორ ეკატერინე კლდიაშვილისთვის ORPHEUS-ის ეს შეხვედრა აღმასრულებელი კომიტეტის წევრის რანგში პირველი იყო. შეხვედრაში მონაწილეობდა კომიტეტის 14 წევრი, რომლებიც წარმოადგენდნენ გერმანიას, ბელგიას, ბრაზილიას, ხორვატიას, დანიას, საქართველოს, უნგრეთს, პორტუგალიას, შვეიცარიასა და თურქეთს. აღმასრულებელი კომიტეტის შემადგენლობა ასახავს ORPHEUS-ის საერთაშორისო და ინკლუზიურ ხასიათს და აერთიანებს სხვადასხვა ქვეყანას, აკადემიურ კულტურას, საგანმანათლებლო სისტემასა და ინსტიტუციურ გამოცდილებას საერთო მისიის გარშემო: ბიომედიცინისა და ჯანმრთელობის მეცნიერებების მიმართულებით სადოქტორო განათლების ხარისხის უზრუნველყოფა.
შეხვედრაზე განიხილეს ORPHEUS-ის სტრატეგიული პრიორიტეტები და შემდგომ განვითარებაზე ორიენტირებული აქტივობები. განხილულ საკითხებს შორის იყო ORPHEUS-ის საუკეთესო პრაქტიკების პოპულარიზაცია, ლეიბელინგისა და თვითშეფასების პროცესების შემდგომი განვითარება, სადოქტორო ფორუმის გაძლიერება, წლიური შეხვედრის ორგანიზება, კომუნიკაცია და ხილვადობა, ასევე სადოქტორო განათლებასა და კვლევით ტრენინგში საერთაშორისო თანამშრომლობის შესაძლებლობები.
თსა-ს გუნდის წევრის ORPHEUS-ის აღმასრულებელ კომიტეტში წევრობა სადოქტორო განათლების ხარისხის, კვლევითი კულტურის, სამეცნიერო ხელმძღვანელობის, კვლევის კეთილსინდისიერებისა და ინსტიტუციური შესაძლებლობების განვითარების თვალსაზრისით მნიშვნელოვან შესაძლებლობას წარმოადგენს.