თბილისის სამედიცინო აკადემიისა (თსა) და თბილისის სახელმწიფო სამედიცინო უნივერსიტეტის (თსსუ) სტუდენტური თვითმმართველობის განათლების კომიტეტის ორგანიზებით, პროექტ ,,ლაბ-ორატორის” ფარგლებში ჩატარდა ლექცია თემაზე: ,,რეოლოგია კლინიკურ მედიცინასა და რეაბილიტაციაში”.

ლექციას უძღვებოდა რეოლოგიისა და დიაგნოსტიკურ-ანალიტიკური სერვისების ლაბორატორიის ხელმძღვანელი, ფიზიკის, თსსუ-ის ბიოფიზიკის ბიომექანიკისა და საინფორმაციო ტექნოლოგიების დეპარტამენტის ასისტენტ-პროფესორი მაკა მანწკავა.

ღონისძიებას ესწრებოდნენ თსა-ს მიკრობიოლოგიის დეპარტამენტის ასოცირებული პროფესორი, ფაკულტეტის განვითარების დეპარტამენტის ხელმძღვანელი მაკა ზარნაძე და სტუდენტები სხვადასხვა უნივერსიტეტიდან.

ღონისძიების დასასრულს, დამსწრე სტუდენტებს ჩაუტარდათ ქვიზი, რომელიც შეეხებოდა მოსმენილ ლექციას. ქვიზის შედეგად, შეირჩა საუკეთესო შედეგის მქონე 20 სტუდენტი, რომლებიც ჩაერთვებიან პროექტში „ლაბ-ორატორი“ და მომდევნო ეტაპზე ეწვევიან რეოლოგიისა და დიაგნოსტიკურ-ანალიტიკური სერვისების ლაბორატორიას, სადაც შესაძლებლობა ექნებათ ცოდნა გაიღრმაონ და მონაწილეობა მიიღონ პრაქტიკულ აქტივობებში. შერჩეულ 20 სტუდენტს შორის არიან თსა-ს სტუდენტებიც.

პროექტის დასკვნითი ეტაპი, რომელიც გულისხმობს საფინალო პრეზენტაციების წარდგენას და გამარჯვებული სტუდენტების გამოვლენას, გაიმართება თბილისის სამედიცინო აკადემიაში.

პროექტ „ლაბ-ორატორის“ მიზანია საზოგადოებაში ცნობიერების ამაღლება რეოლოგიასა და ბიორეოლოგიის თემატიკაზე, როგორც თეორიული ისე პრაქტიკული მიმართულებით. პროექტი განხორციელდება სამ ეტაპად. პირველ ეტაპზე დაინტერესებული სტუდენტები მოისმენენ ლექციას. ლექციის შემდეგ, შერჩეული 20 მონაწილე პრაქტიკულ მეცადინეობას უკვე ლაბორატორიაში გაივლის, ხოლო დასკვნით ეტაპზე, პროექტის მონაწილე სტუდენტები ჯგუფურად წარადგენენ პრეზენტაციებს და მათგან საუკეთესოს სპეციალური ჟიური გამოავლენს.

პროექტის მხარდამჭერია სპორტის, ტურიზმისა და ახალგაზრდობის საერთაშორისო ფონდი.