“არითმიის ზამთრის სკოლა” მოტივირებულ სტუდენტებს საშუალებას აძლევს გააფართოონ ცოდნა მედიცინის მიმართულებით და მონაწილეობა მიიღონ მრავალფეროვან პრაქტიკულ სემინარებსა და ლექციებში.

თსა-ს ორგანიზებით, ბაკურიანმა „არითმიის ზამთრის სკოლას“ უმასპინძლა. ღონისძიების მიზანი იყო მრავალეროვნული სტუდენტებისა და ახალგაზრდა ექიმების შეკრება ცოდნის გაცვლის, ECG კითხვისა და გადაუდებელ შემთხვევებში გადაწყვეტილების მიღების საკითხებთან დაკავშირებით უნარების გამომუშავება.

“ბაკურიანში ჩატარებულმა ტრენინგმა შესაძლებლობა მომცა უფრო დეტალურად მესწავლა კარდიოგრამები, კარდიოლოგია და კიდევ ერთხელ დამენახა ექიმის ყოველდღიურ ცხოვრებაში მათი მნიშვნელობა. ასევე, ძალიან საინტერესო იყო პირველადი დახმარების კურსები, რაც ვფიქრობ არა მარტო ექიმებს, ყველა ადამიანს უნდა ჰქონდეს გავლილი, რადგან ერთ დღეს შეიძლება ამ ცოდნით ადამიანის სიცოცხლე გადავარჩინოთ” - აღნიშნა თსა-ს სტუდენტმა ლიზი მოყვანიძემ.

წელს, ტრენინგში თსა-ს სტუდენტებთან ერთად, უცხოელი პარტნიორი უნივერსიტეტების სტუდენტებმაც (სტამბოლის ალთინბაშის უნივერსიტეტი) მიიღეს მონაწილეობა. გარდა ამისა, ტრენინგებში ასევე მონაწილეობდნენ თბილისის სახელმწიფო უნივერსიტეტის, თბილისის სახელმწიფო სამედიცინო უნივერსიტეტის, გრიგოლ რობაქიძის სამედიცინო უნივერსიტეტის, ალტე უნივერსიტეტისა და ქართულ-ამერიკული უნივერსიტეტის მედიცინის მიმართულების სტუდენტები.

მდიდარ სამეცნიერო პროგრამასთან ერთად, სტუდენტები ასევე ჩაერთნენ სოციალურ საინფორმაციო კამპანიაში „პირველადი გადაუდებელი დახმარება გულის გაჩერების დროს“. აღნიშნული ღონისძიებები და გადაუდებელ შემთხვევებში პირველი დახმარების უნარ-ჩვევების გავრცელება თანხვედრაშია ERASMUS+ პროექტ LIFESTRAND -ის მიზნებთან და ამოცანებთან.

პროექტი LIFESTRAND მიზნად ისახავს უკრაინისა და საქართველოს უნივერსიტეტების პერსონალისთვის, სტუდენტებისთვის და ფართო საზოგადოებისთვის პირველადი დახმარების უნარების სწავლებას და ამ მიმართულებით გამოცდილების გაზიარებას.

ინსტიტუციური განვითარების პროექტი - LIFESTRAND შეიქმნა, დაიგეგმა და ხორციელდება უშუალოდ თსა-ს კოორდინირებით. პროექტი აერთიანებს საქართველოს, უკრაინის, ესპანეთისა და პორტუგალიის 9 უნივერსიტეტს.