თსა-ს სტუდენტური კლუბის „საზოგადოების დამხმარეების“ ინიციატივით კიდევ ერთი სოციალური პროექტი განხორციელდა. “სიკეთით ზრუნვა” ამ სლოგანის გარშემო გააერთიანა კლუბის ხელმძღვანელმა ანანო ახობაძემ თსა-ს სტუდენტები, რომლებმაც შეაგროვეს ტანსაცმელი მცირე საოჯახო ტიპის სახლისთვის, რომლის ბენეფიციარებიც ბავშვები არიან. 

 

კლუბის წევრებმა ამ ინიციატივის განხორციელებაში ჩართეს ქალაქ თბილისის 61-ე საჯარო სკოლაც.  სტუდენტებმა სკოლის მოსწავლეებს გააცნეს პროექტის არსი და მნიშვნელობა. მოსწავლეებს კი ერთი კვირის განმავლობაში უნდა შეეგროვებინათ ბავშვებისთვის საჭირო ინვენტარი, ტანსაცმელი, სათამაშოები, წიგნები და სხვა. სტუდენტებისა და მოსწავლეების ერთობლივი ძალისხმევით შეგროვებული ნივთები გადაეცა მცირე საოჯახო ტიპის სახლს “Divine Child Foundation of Georgia (DCFG)”. პროექტის მიზანი იყო, რომ საოჯახო ტიპის სახლებში მცხოვრები ბავშვებისათვის გაელამაზებინათ ერთი ჩვეულებრივი დღე და გამოეხატათ მათ მიმართ სითბო და მზრუნველობა.

“პროექტს „სიკეთით ზრუნვა“ დავარქვი. მიზანი მქონდა, რომ ამ ბავშვებისთვის სითბო და სიყვარული დაგვენახებინა. ვფიქრობ, რთულია მათი რეალობა და ძალიან სჭირდებათ მსგავსი სიყვარულის გამოხატვა ჩვენგან. ზუსტად სიყვარული გვაერთიანებს საბოლოო ჯამში ყველა ჩვენგანს, ის გვაძლევს ენერგიას და იმედსაც უკეთესი მომავლის. ელდარ შენგელაიას ფილმის გმირი ამბობს „სიყვარულია მშობელი ოცნებისა“ და მე მჯერა ამის, მთავარია სხვებსაც მივცეთ შესაძლებლობა ამის დანახვის” - აღნიშნა ანანო ახობაძემ.