„აკადემიის შესახებ მეგობრებისგან და სოციალური ქსელებიდან გავიგე. ბევრი ჩემი მეგობარი სწავლობს აქ და მათ მირჩიეს. მოლოდინი თავიდანვე კარგი მქონდა და დაახლოებით წარმოდგენაც მქონდა როგორი გარემო დამხვდებოდა. ახლა კი, კიდევ უფრო დავრწმუნდი, რომ სწორი არჩევანი გავაკეთე პირველ ადგილზე რომ ჩავწერე თსა. იმიტომ, რომ აქ სტუდენტზე და სწავლაზე ორიენტირებული გარემოა, თანამედროვე მიდგომები, კეთილგანწყობილი ლექტორები და ეს სწორედ ის არის, რასაც მე ვეძებ უნივერსიტეტში. დავრწმუნდი, რომ სწორი შეფასება ჰქონდათ ჩემს მეგობრებსაც აკადემიაზე. სოციალური ქსელებიდან რასაც ვადევნებდი თვლას, ზუსტად ის დამხვდა აქ“ - აღნიშნა ღია კარის დღეზე მოსულმა აბიტურიენტმა თეკლე ჭინჭარაულმა, რომელიც პირველი ექსპერიმენტული სკოლის მე-12 კლასელია.

ღია კარის დღეები თსა-ში გრძელდება. მედიცინით დაინტერესებულ აბიტურიენტებს ამჯერად შესაძლებლობა მიეცათ მიეღოთ ვირტუალური საავადმყოფოს გამოცდილება. CyberPatient ეს არის ერთგვარი ხიდი თეორიასა და პრაქტიკას შორის. ამ პლატფორმის საშუალებით შესაძლებელია ვირტუალური პაციენტის გასინჯვა, ისტორიის აღება, ფიზიკალური გასინჯვა, დიაგნოსტირება, მკურნალობა და დაკვირვება. თსა-ში მოსულ აბიტურიენტებს შესაძლებლობა მიეცათ თავად მოერგოთ ექიმის როლი და შეხვედროდნენ ვირტუალურ პაციენტებს. გარდა ამისა, აბიტურიენტებმა მიიღეს ინფორმაცია სასწავლო და გაცვლითი პროგრამებისა და დაფინანსების შესაძლებლობების შესახებ. ასევე, დაათვალიერეს შენობა და გაეცნენ ყველა იმ სასწავლო რესურსს, რასაც სწავლის პროცესში აქტიურად გამოიყენებენ. ტრადიციულად, აბიტურიენტებს მეგზურობას თსა-ს სტუდენტები უწევდნენ.