სტუდენტურმა კლუბმა „გულის მცველებმა“ დაინტერესებული სტუდენტებისათვის ელექტროკარდიოგრაფიის (ეკგ) კურსები ჩაატარეს. სესიები ჩატარდა როგორც ქართულ, ასევე ინგლისურ ენაზე, რომელსაც უძღვებოდნენ კლუბის ხელმძღვანელი რიშუ შაჰი და თანახელმძღვანელი გვანცა ომიაძე. კურსის მიზანი იყო ფუნდამენტური ეკგ ცოდნის მიწოდება დაინტერესებული სტუდენტებისთვის. სესიები მოიცავდა ინტერაქციულ ელემენტებს, როგორიცაა დისკუსიები, ვიქტორინები და დასკვნითი ე.წ. Kahoot თამაში. Kahoot – ეს არის ონლაინ თამაშზე დაფუძნებული სასწავლო პლატფორმა, რომელიც აერთიანებს სასწავლო თამაშებსა და ტესტებს ნებისმიერ საგანში და ნებისმიერ ენაზე.

კურსში ჯამურად მონაწილეობა მიიღო დაახლოებით 20 სტუდენტმა, ხოლო თამაშის გამარჯვებული სტუდენტები დასაჩუქრდნენ ეკგ სახაზავებით. საზომები უზრუნველყო თსა-მ ზამთრის არითმიის სკოლასთან თანამშრომლობით.

მნიშვნელოვანია ის, რომ სტუდენტების მხრიდან ინტერესი საკმაოდ მაღალი იყო კურსის მიმართ, შესაბამისად, კლუბი „გულის მცველები“ სტუდენტებს არაერთ საინტერესო აქტივობას ჰპირდება სამომავლოდაც.

კლუბი, რომლის დევიზიც არის „იყავი დროული და ენერგიული“ მიზნად ისახავს სტუდენტების გაერთიანებას კარდიოლოგიური თემების გარშემო.