თსა-ს მედიცინის სკოლის დეკანს ლალი მეკოკიშვილს დერმატოლოგიის მიმართულების განვითარებასა და საქართველოსა და პოლონეთის საზოგადოებებს შორის თანამშრომლობაში გაწეული წვლილისათვის პოლონეთის დერმატოლოგთა საზოგადოების საპატიო წევრის სტატუსი მიენიჭა. გადაწყვეტილება პოლონეთის დერმატოლოგთა საზოგადოების საბჭომ მიიღო და ვროცლავის უნივერსიტეტის ისტორიულ დარბაზში საიუბილეო სპეციალური მედალი საზეიმოდ გადასცა.

მედლის გადაცემის საზეიმო ღონისძიება წინ უძღოდა VIII კონტინენტალური კონგრესს დერმატოლოგიაში. წელს, კონგრესზე ლალი მეკოკიშვილმა მონაწილეობა მიიღო როგორც სამეცნიერო კომიტეტის წევრმა და პლენარულმა მომხსენებელმა. მან თანამედროვე ცოდნა და საკუთარი გამოცდილება გაუზიარა აუდიტორიას ბავშვთა ასაკის აკნესთან დაკავშირებით. ამასთან, მისმა სამმა მოსწავლემ კონგრესზე მონაწილეობის გრანტი მოიპოვა და ახალგაზრდა დერმატოლოგთა სესიაზე საინტერესო კლინიკური შემთხვევები წარმოადგინა. მათ შორის ერთ-ერთი გახლდათ თსა-ს მოწვეული ლექტორი კახა ბრეგვაძე.

დერმატოლოგთა კონტინენტალური კონგრესი 4 წელიწადში ერთხელ დერმატოლოგთა საერთაშორისო საზოგადოების ორგანიზებით სხვადასხვა ქვეყანაში იმართება. კონგრესზე დერმატოლოგიის დარგში უახლეს სამეცნიერო/პრაქტიკულ მიღწევებს წარმოადგენენ მეცნიერები და პრაქტიკოსი ექიმები მსოფლიოს თითქმის ყველა ქვეყნიდან.