თბილისის სამედიცინო აკადემიისა და არითმიის სკოლის თანაორგანიზებით, ბაკურიანმა წელსაც ტრადიციულად უმასპინძლა პროექტს - „არითმიის ზამთრის სკოლა 2026“.

არითმიის ზამთრის სკოლა ერთ-ერთი მნიშვნელოვანი საგანმანათლებლო ღონისძიებაა, რომელიც მიზნად ისახავს მედიცინის სტუდენტებისა და ახალგაზრდა ექიმების ცოდნის ამაღლებას ელექტროკარდიოგრაფიის (ეკგ) და არითმიის მართვაში.

ზამთრის სკოლის ინიციატივა უკვე რამდენიმე წელს ითვლის, ბოლო ორი წელი კი ღონისძიება თბილისის სამედიცინო აკადემიის ინსტიტუციური პროექტის LIFESTRAND-ის ეგიდით ხორციელდება.

სამი დღის განმავლობაში მონაწილეები სიღრმისეულად მუშაობდნენ ეკგ-ს ინტერპრეტაციაზე, არითმიების ამოცნობასა და მართვაზე, ასევე გადაუდებელი დახმარებისა და ტრიაჟის პრაქტიკულ ალგორითმებზე. რეალურმა კლინიკურმა ქეისებმა, სიმულაციურმა გარემომ და გუნდურმა მუშაობამ პროგრამა განსაკუთრებით ინტერაქციული და შედეგზე ორიენტირებული გახადა.

დასკვნითი დღე დაეთმო კლინიკური ქეისების განხილვასა და Kahoot-ის კონკურსს, სადაც მონაწილე უნივერსიტეტებს შორის ინდივიდუალურ და გუნდურ ასპარეზზე თსა-ს სტუდენტებმა პირველი ადგილი დაიკავეს.

„არითმიის ზამთრის სკოლა“ არ არის მხოლოდ ტრენინგი, ეს არის სივრცე, სადაც თეორია პრაქტიკად იქცევა და მომავალი ექიმები სწავლობენ სწრაფი, ზუსტი და პასუხისმგებლიანი გადაწყვეტილებების მიღებას.