“ერთად მარტოობის წინააღმდეგ” - ეს არის დაუნის სინდრომის მსოფლიო ორგანიზაციის 2026 წლის მარტის კამპანიის მთავარი გზავნილი, რომელიც მიზნად ისახავს საზოგადოებაში ინკლუზიურობის გაძლიერებასა და თანადგომის მნიშვნელობის ხაზგასმას.

თბილისის სამედიცინო აკადემია ტრადიციულად შეუერთდა კამპანიას და პარტნიორ ორგანიზაციას, სოციალურ საწარმო “ბაბალეს”  უმასპინძლა.

აკადემიაში მოეწყო დაუნის სინდრომის მქონე მოზარდების მიერ შექმნილი ნამუშევრების გამოფენა-გაყიდვა. ჭრელი წინდები, რომელსაც ორგანიზაცია „ბაბალე“ ქმნის, ორიგინალური და უნიკალური დიზაინით გამოირჩევა. წინდები შექმნილია ქართველი მხატვრებისა და დაუნის სინდრომის მქონე ახალგაზრდების კოლაბორაციით და სპეციალურად „ბაბალესთვის” შექმნილ უნიკალურ პროდუქციას წარმოადგენს.

თსა, როგორც საზოგადოების კეთილდღეობაზე ორიენტირებული ინსტიტუცია, მუდმივად ჩართულია მსგავსი კამპანიების განხორციელებაში. აკადემია განსაკუთრებულ მნიშვნელობას ანიჭებს ინკლუზიური გარემოს შექმნას და ახალგაზრდებში სოციალური პასუხისმგებლობის გაძლიერებას. მსგავსი კამპანიების განხორციელებით, თსა ცდილობს აამაღლოს ცნობიერება საზოგადოებაში დაუნის სინდრომის მქონე ადამიანების მიმართ და ხელი შეუწყოს მათ მიმართ არსებული სტიგმისა და სტერეოტიპების მსხვრევას.